NKOBA MABULA ATAKA UBUNIFU ZAIDI KUONGEZA WATALII WA NDANI

Na Brigitha Kimario, Serengeti

NAIBU Katibu Mkuu - Utalii, Nkoba Mabula ameitaka Menejimenti ya Hifadhi ya Taifa Serengeti na Shirika la Hifadhi za Taifa Tanzania (TANAPA) kuendelea kutoa elimu ya Utalii wa ndani kwa jamii na ubunifu utumike ili kuongeza idadi ya watalii hususani watalii wa ndani.

Mabula ametoa wito huo katika ziara ya kikazi Serengeti yenye lengo la kukagua miradi ya maendeleo pamoja na shughuli za Uhifadhi na Utalii katika Hifadhi hiyo mkoani Mara.

"Muendelee kutoa elimu ya Utalii wa ndani katika vyuo, shule za Sekondari na msingi, walimu na taasisi. Kidogo kidogo wataelewa na kuanzisha programu maalum za usafiri ili waweze kumudu."

Aidha, Mabula amewapongeza Maafisa na askari kwa weledi mkubwa katika kazi licha ya changamoto zinazoikabili Hifadhi na kuahidi kuwa changamoto zote amezipokea na atazifikisha kwa viongozi wa juu .

Awali, akiukaribisha ugeni huo kwa niaba ya Kamishna wa Uhifadhi - TANAPA, Naibu Kamishna wa Uhifadhi na Maendeleo ya Biashara Massana Mwishawa alisema, Hifadhi ya Taifa Serengeti imekuwa ikipokea wageni wengi kwa kipindi chote cha mwaka, hivyo inakabiliwa na changamoto mbalimbali hususani changamoto ya miundombinu.

"Changamoto kubwa katika Hifadhi hii ni miundombinu ya barabara na baadhi ya viwanja vya ndege kwani ndege, magari na wageni wanazidi kuongezeka siku hadi siku."

Naibu Kamishna, Mwishawa alibainisha ni faraja kubwa kwa viongozi kufika na kufanya ziara, kuona uhalisia wa utendaji kazi kutoka juu mpaka ule wa chini na kuishukuru Serikali kupitia Wizara ya Maliasili na Utalii kwa jitihada kubwa inayoendelea kuzifanya katika kuboresha miundombinu mbalimbali pamoja na miradi ya maendeleo katika hifadhi za Taifa.

Naibu Katibu Mkuu Nkoba Mabula anaendelea na ziara ya kukagua miradi mbalimbali ya maendeleo katika hifadhi ya Taifa Serengeti ambayo ni hifadhi bora barani afrika kwa miaka mitano mfululizo ikiwa ni maarufu zaidi duniani kwa msafara wa nyumbu wanaohama kila mwaka pamoja na uwepo wa wanyama wengi wadogo kwa wakubwa yaani “The Big five”.