ZANZIBAR YAPATA UANACHAMA WA CAF, FIFA

Hatimaye Kilio cha Wazanzibara kimepata jibu baada ya mkutano mkuu wa 39 wa Shirikisho la soka barani Afrika (CAF) unaoendelea mjini Addis Ababa, Ethiopia, umepitisha ombi la Chama cha Mpira wa Miguu Zanzibar (ZFA), kuwa mwanachama rasmi wa Shirikisho la Mpira wa Miguu Afrika CAF.

Ni jambo la kihistoria kwa Zanzibar kwani safari hii ombi lao limepitishwa bila kupingwa na inakuwa nchi ya 55 mwanachama wa kujitemea wa CAF.

Awali Zanzibar ilikuwa inaunganishwa na Tanzania bara chini ya TFF na kusababisha kukosa haki za kushiriki kama nchi kwenye mashindano yanayoandaliwa na CAF na Shirikisho la Kimataifa la Mpira wa Miguu (FIFA).

Pendekezo hilo lilipelekwa na Rais wa Shirikisho la Mpira wa Miguu Tanzania (TFF, Jamal Malinzi na lilipokelewa na wajumbe 54 wengine waliokuwepo.

Hii maana yake ni kuwa kwa sasa CAF ndio shirikisho mwanachama wa FIFA kwa upande wa mabara lenye wanachama wengi zaidi kuliko wote.

Vilabu vya Zanzibar vimekuwa vikishiriki mashindano mbalimbali ya CAF lakini kwa ngazi ya kitaifa hawakuwa na ruhusa na walicheza kwa kuungana na Tanzania bara na kushiriki kama Tanzania.

Kwa maana hiyo basi, chama cha soka cha Zanzibar kitapata uwezeshaji wa kifedha moja kwa moja kutoka CAF na FIFA kwa ajili ya timu ya taifa.