Zambia mabingwa Afrika kwa vijana chini ya miaka 20

---

LUSAKA, Zambia

FAINALI ya vijana wenye umri chini ya miaka 20 ya Afrika imemalizika usiku wa kuamkia leo katika Uwanja wa Taifa wa Mashujaa nchini Zambia, baada ya wenyeji kuifunga Senegal mabao 2-0.

Mabao mawili yaliyowapa ubingwa Zambia yalifungwa na Patson Daka na Edward Chilufya.

Ulikuwa ubingwa wa kwanza kwa timu za vijana wan chi hiyo, lakini ukiwa wa pili baada ya nchini hiyo kubeba kombe la wakubwa la Mataifa ya Afrika mwaka 2012.

Zambia ilikuwa katika kiwango bora cha juu katika michuano hiyo ilipomaliza katika nafasi ya nne mwaka 1991, 1999 na 2001.

Ilikuwa ni mara ya pili kwa timu ya taifa ya Senegal kucheza fainali, mara ya kwanza ilikuwa nyumbani kwao miaka miwili iliyopita, lakini ilichapwa  bao 1-0 dhidi ya Nigeria katika ardhi yao.

Kufungwa na Zambia, ni mara ya kwanza kwa vijana wa Francois Koto, tangu mwaka 2015.

Usiku wa kuamkia leo ulikuwa wa furaha kwa wenyeji Zambia, baada ya Patson Daka kuifungia bao la kwanza nchi yake dakika ya 16, baada ya kipa wa Senegal, Lamine Sarr kushindwa kuudaka mpira uliopigwa na Fashion Sakala.

Bao la pili liliwanyong’onyesha nguvu Senegal liliwekwa wavuni dakika 35, baada ya kipa Sarr kulazimika kuondokana langoni kwake kuuwahi mpira, lakini ulingonga Edward Chilufya, na kutumbukia wavuni.

Nafasi ya tatu katika michuano hiyo ilichukuliwa na Guinea baada ya kuifunga Afrika Kusini mabao 2-1 na kupata medali za shaba.

Timu zote nne zilizocheza nusu fainali zimekata tiketi ya kucheza fainali za Kombe la Dunia mwaka za vijana wenye umri chini ya miaka 20, itakayopigwa nchini Jamhuri ya Korea kuanzia Mei 20 hadi Juni 11, 2017.

Ratiba ya fainali za Kombe la Dunia kwa vijana wenye umri chini ya miaka 20 itapangwa Jumatano Machi 15, 2017.

Rais wa Zambia, Edgar Lungu akiwa mashika ngao ya ubingwa wa mashindano ya mataifa ya Afrika kwa vijana wenye umri chini ya miaka 20. Kulia ni Rais wa Shirikisho la Mpira wa Miguu Afrika (caf), Issa Hayatou.

Wachezaji wa Zambia wakishangilia baada ya mechi dhidi ya Senagal ya fainali za vijana wenye umri chini ya miaka 20 kumalizika, usiku wa kuamkia leo jijini Lusaka.

Wachezaji wa timu ya taifa ya Zambia ya vijana  wenye umri chini ya miaka 20 wakiwa wamevaa medali ya dhahabu huku wakiwa na maua waliyozawaidiwa kwa kubeba ubingwa wa Afrika usiku wa kuamkia leo jijini Lusaka.