Bayern Munich yaididimiza Arsenal 5-1, yatinga robo fainali kwa jumla ya mabao 10-2

Theo Walcott akiifungia Arsenal bao dhidi ya  Bayern Munich katika mechi ya Klabu Bingwa Ulaya iliyopigwa usiku wa kuamkia leo jijini London.

Robert Lewandowski akiisawazishia Bayern Munich bao kwa mkwaju wa penalti.

Kiungo Arturo Vidal, akishangilia baada ya kuifungia Bayern Munich bao la nne na tano.

MABINGWA wa soka nchini Ujerumani, Bayern Munich usiku wa kuamkia leo imeididimiza Arsenal ya England mabao 5-1, katika mechi ya Klabu Bingwa Ulaya iliyopigwa Uwanja wa Emirates jijini London, hivyo imesonga mbele kwa jumla ya mabao 10-2.

Katika mechi ya kwanza, Arsenal ikiwa ugenini ilisalimu amri kwa kupigwa mabao 5-1 na kuweka historia katika michuano hiyo ya kufungwa mabao yenye idadi sawa katika mechi zote mbili.

Arsenal walianza mchezo huo kwa kuonesha nia ya kulipa kisasi, baada ya Theo Walcott kuwapa furaha ya muda mfupi mashabiki wao kwa kufunga bao dakika 20.

Lakini, Robert Lewandowski aliisawazishia Bayern Munich bao hilo kwa mkwaju wa penalti dakika ya 55, huku beki Laurent Koscielny wa Arselan akitolewa nje kwa kuoneshwa kadi nyekundu.

Nahodha wa Real Madrid, Sergio Ramos, akishangilia baada ya kuisawazishia timu yake bao dhidi ya Napoli.

Alvaro Morata akishangilia bao la tatu alilofunga dhidi ya Napoli.

Dries Mertens akishangilia bao aliloifungia Napoli dhidi ya Real Madrid.

Katika mechi nyingine ya Klabu Bingwa Ulaya, Nahodha wa Real Madrid, Sergio Ramos aliisawazishia timu yake bao la kwanza dakika ya 51 dhidi ya Napoli, katika mechi iliyopigwa kwenye Uwanja wa San Paolo nchini Italia.

Napoli, katika mechi ya kwanza iliyochezwa jijini Madrid, Hispania ilipigwa mabao 3-1, ilikuwa ya kwanza kupata bao dakika ya 24, lililowekwa kimiani na Dries Mertens.

Lakini, Ramos aliisazishia timu yake bao hilo kwa mpira wa kichwa, huku akisababisha la pili kwa mpira wa kichwa uliogonga Mertens dakika ya 57.

Alvaro Morata aliyetokea kwenye benchi aliifungia Real Madrid bao la tatu dakika ya 90 na kuiwezesha timu yake kusonga mbele hatua ya robo fainali kwa jumla ya mabao 6-2.