Serikali yatoa msimamo katika kulinda kazi za filamu nchini

Waziri wa Habari, Utamaduni, Sanaa na Michezo Mhe. Nape Moses Nnauye (kushoto) akizungumza na wadau wa sekta ya filamu (hawapo pichani) wakati wa kikao cha wadau kuzungumzia sera ya filamu leo Jijini Dar es Salaam. Katikati ni Naibu Waziri Habari, Utamaduni, Sanaa na Michezo Mhe. Annastazia Wambura na Kulia ni Naibu Katibu Mkuu wa Wizara hiyo Bibi. Nuru Millao

…………………………………………………..

Na Lorietha Laurence – WHUSM

Waziri wa Habari, Utamaduni, Sanaa na Michezo Mhe. Nape Moses Nnauye ameeleza msimamo wa serikali katika kulinda kazi za filamu zinazouzwa nchini  kuzingatia sheria  na. 4 ya mwaka 1976 ya utengenezaji wa filamu na Michezo ya kuigiza.

Mhe. Nnauye ameyasema hayo leo Jijini Dar es Salaam alipokutana na  wadau wa filamu ikiwa ni mwendelezo wa Kipindi cha “Wadau Tuzungumze” kilichoandaliwa na Wizara  kwa kuwashirikisha wadau wake wa kisekta.

“Ni wajibu kwa wanatasnia wa filamu kufuata sheria katika kuuza bidhaa zao bila kujali zimetoka nje ya nchi au ni za hapa hapa nchini ili kuwa na soko huru na la haki kwa filamu na michezo ya kuigiza” alisema Mhe. Nape.

Pamoja na hayo Mhe. Nnauye aliongeza kuwa ni wajibu wa kila mwanatasnia wa filamu kuhakikisha kuwa wanatoa ushirikiano katika kutoa maoni ya kuandaa Sera ya filamu ambayo itakuwa mwongozo katika kuendesha na kusimamia kazi za filamu nchini.

Aidha Waziri Nape aliutaka uongozi wa Wizara kwa kushirikiana na Katibu Mtendaji wa Bodi ya Filamu kuhakikisha kuwa wanakutana na wadau ili kukamilisha uundwaji wa sera hiyo.

“ Naomba Katibu Mkuu na Katibu Mtendaji wa Bodi ya Filamu kuhakikisha kuwa mnawasikiliza wadau wa filamu katika kuandaa sera hii na ningependa ikamilike mapema  mwezi wanne mwaka huu ili kuharakisha mchakato wa kulinda kazi kama ilivyokuwa maadhimio ya Mhe. Rais wa Jamhuri ya Muungano wa Tanzania Dkt. John Pombe Magufuli” alisema Mhe. Nnauye.

Kwa upande wake Katibu Mtendaji wa Bodi ya Filamu nchini Bibi. Joyce Fissoo aliahidi kutekeleza agizo na kupanga kukutana na wadau wa filamu upande wa watayarishaji Februari 28 mwaka huu, ili kupata maoni kuhusu uundwaji wa sera ya filamu.

Naye Msanii wa Filamu za kuigiza nchini Bw. Single Mtambalike amewataka wadau wa filamu kushirikiana na serikali kwa kutoa maoni yao yatakayosaidia  katika kukamilisha Sera ya filamu itakayotoa mwongozo thabiti kwa tasnia hiyo.

Kipindi cha “Wadau Tuzungumze” kimekuwa kikitoa fursa kwa wadau wa sekta za Habari, Utamaduni, Sanaa na Michezo kujadili mambo mbalimbali yanayohusu sekta hizo ikiwemo kutatua changamoto zinazowakabili lengo ikiwa ni kuimarisha uhusiano mzuri baina ya Wizara na wadau hao.